Angelina Jolie ekki aðdáandi Keibler

Eitthvað hefur slest upp á vinskap George Clooney við Angelinu Jolie og Brad Pitt ef marka má US Weekly. Í frétt blaðsins kemur fram að Clooney og kærasta hans, glímukonan Stacy Keibler, hafi deilt einkaþotu með Jolie og Pitt á leið til Palm Springs og að andrúmsloftið um borð hafi ekki verið hlýlegt.

Fjórmenningarnir voru á leið á Palm Springs-kvikmyndahátíðina 7. janúar síðastliðinn og sagði Jolie ekki eitt aukatekið orð við Keibler meðan á flugferðinni stóð.

„Hún lét sem Stacy væri ekki til og leit ekki einu sinni í áttina að henni. Hún kunni augljóslega ekki vel við hana. Angelina er ekki mjög stelpuleg, ólíkt Keibler," var haft eftir heimildarmanni.

Sami heimildarmaður hélt því einnig fram að Clooney væri hreint ekki hrifinn af Jolie heldur. „Honum finnst hún leiðinleg og finnst ekki gaman að eyða tíma með henni."