Rúturnar færðar lengra frá Leifsstöð

"Það er langur gangur frá útgangi Leifsstöðvar og út á nýja rútustæðið, sérstaklega þegar maður er með ferðatöskur á kerru," segir Þorbjörg Jónsdóttir ferðalangur um nýtt rútustæði fyrir utan Leifsstöð.

Stæðið fyrir rúturnar var áður beint fyrir utan innganginn á flugstöðinni. Nú þurfa farþegar hins vegar að ganga með farangur sinn yfir skammtímabílastæðið sem er fyrir framan Leifsstöð, yfir götu og þaðan inn á stæðið fyrir rúturnar.

Þorbjörg tók rútu frá Keflavíkurflugvelli til Reykjavíkur um síðustu helgi. Hún er ósátt við nýja stæðið.

"Það vildi svo til að það var suðaustanátt, rigning og rok. Það komu allir rennandi blautir og hraktir í rútuna. Þarna var einnig eldri kona sem hrasaði þegar vindurinn tók í kerruna hennar," segir Þorbjörg.

Agnar Daníelsson framkvæmdastjóri Kynnisferða segir bæði kosti og galla við nýja skipulagið.

"Það góða er að við höfum búið við mikið plássleysi við flugstöðina síðustu ár. Umhverfið hefur í raun verið hættulegt af þeim sökum þar sem erfitt var fyrir bílstjóra að sjá fólk í kringum bílana. Gallinn er staðsetningin."

Þórir Garðarsson sölu- og markaðsstjóri Iceland Excursion er á sama máli. "Auðvitað er ljóst að aðstaðan við flugvöllinn var sprungin. Það var svo mikil umferð þarna að rúturnar voru komnar í röð sem náði nánast út á akveginn," segir Garðar. Bæði Garðar og Agnar gera ráð fyrir að breytingarnar séu tímabundnar. "Við lítum svo að að þetta sé bráðabrigðaaðgerð og að í vetur verði bílastæðið fært á gamla staðinn aftur," segir Garðar.

Svo er hins vegar ekki, ef marka má upplýsingar frá talsmanni Isavia. "Þetta er bara til framtíðar, því aðstaðan sem er upp við húsið var aldrei hönnuð fyrir alla þá umferð sem er orðin þarna," segir Friðþór Eydal, talsmaður Isavia. "Þetta fer aldrei í sama far, því það er hreinlega ekki pláss," segir Friðþór.

Hann útilokar þó ekki að einhverjar ráðstafanir verði gerðar til að auka skjól á gönguleiðinni í vetur. katrin@frettabladid.is