Bíða eftir plássi á Landspítala

Hátt í 50 einstaklingar liggja á Landspítalanum og bíða vistunar á hjúkrunarheimili en meðferð á spítalanum er lokið. Þar að auki eru margir sem eru í öldrunarendurhæfingu eða bíða hennar og því nýtast rýmin ekki fyrir bráðasjúklinga. Þetta, auk þess sem sífellt fleiri sækja þjónustu á LSH, veldur því að gangainnlagnir færast aftur í vöxt, en vandamálið var umtalað fyrir þremur til fjórum árum.

Þetta kemur fram í skrifum Björns Zoëga, forstjóra Landspítalans, sem segir að síðustu vikurnar hafi verið óvenju mikið álag á starfsfólk spítalans. „Helsta skýring á því að það hefur þurft að leggja fólk á gangana er að ekki hefur verið til venjulegt legupláss,“ segir Björn og tekur sem dæmi að bráðainnlögnum á lyflækningasviði hefur fjölgað á síðustu tveimur árum um 20%. Hann segir ekki auðvelt að leysa úr þessum vanda með stuttum fyrirvara.

Augljóst er, að mati Björns, að á næsta ári þurfi að reyna að opna og reka fleiri legurými sem nýtast fyrir sjúklinga allan sólarhringinn alla daga. „Á meðan þurfum við að berjast við að reyna að útskrifa alla sjúklinga um leið og þeir eru tilbúnir,“ segir Björn jafnframt.

- shá