Hlakkar til að fara á Hróarskeldu

Orri Páll Dýrason, trommuleikari í Sigur Rós, segist vera farinn að hlakka til þess að spila á Hróarskeldunni á næsta ári. Tilkynnt var í morgun um fyrstu hljómsveitirnar sem hafa staðfest mætingu og er Sigur Rós ein þeirra. Þetta er í fyrsta sinn í sjö ár sem Sigur Rós spilar á hátíðinni. „Já, það er mjög langt síðan við höfum verið þar," segir Orri Páll sem segir jafnframt að það sé alltaf gaman að vera á hátíðinni.

„Ég hef komð þangað síðan að ég var unglingur með bakpoka sjálfur," segir hann. Hljómsveitin er enn á tónleikaferðalagi, en héldu meðal annars vel heppnaða tónleika á Iceland Airwaves um daginn. „Það var rosa gaman og fín stemning," segir hann. „Við erum í Ástralíu núna," bætir Orri Páll við. Þar hefur hljómsveitin verið undanfarna daga og verða í einhverja daga í viðbót.