Framkvæmdastjórinn sakaður um frændhygli, sjálftöku og bókhaldsóreiðu

Ýmislegt bendir til að fjárhagserfiðleika og óráðsíu innan Eirar megi rekja mörg ár aftur í tímann í framkvæmdastjórastíð séra Sigurðar Helga Guðmundssonar sem lét af starfi á síðasta ári. Meðal annars lét séra Sigurður Helgi Eir greiða fyrir flugfarseðla dóttur sinnar og fjölskyldu hennar.

Séra Sigurður Helgi lét hjúkrunarheimilið greiða fyrir utanlandsferð dóttur sinnar Vilborgar og fjölskyldu hennar í ágúst 2011, en reikningurinn nam 200 þúsund krónum. Fór Vilborg þá með Icelandair til Alicante á Spáni og var þar í tvær vikur ásamt eiginmanni sínum og börnum á kostnað Eirar, en Eir hafði keypt gjafabréf hjá Icelandair sem fjölskyldan nýtti sér.

Frá þessu er greint í DV í dag og haft eftir Sigurði Helga að kaupin á utlandsferðinni hafi verið þóknun fyrir lögmannsþjónustu sem tengdasonur hans, Jóhannes Rúnar Jóhannsson hrl. hafði veitt Eir en aldrei krafist greiðslu fyrir.

Ekkert kom hins vegar fram í bókhaldi Eirar að um væri að ræða kaup á gjafakorti fyrir fjölskyldu dóttur Sigurðar Helga og enn síður að um hefði verið að ræða greiðslu fyrir lögfræðistörf sem tengdasonurinn hefði unnið fyrir Eir.

Það er ýmislegt fleira sem virðist orkar tvímælis í rekstri Eirar. Þannig er séra Sigurður Helgi sakaður um frændhygli í rekstri stofnunarinnar með því að raða ættingjum í góðar stöður, meðal annars konu sinni og dóttur, skipta ítrekað við sama verktakann án útboðs og látið stofnunina kaupa hjúkrunargögn af heildverslun í sinni eigu eftir að hann tók við sem framkvæmdastjóri árið 1993.

Farið fram á rannsókn á framkvæmdastjóratíð Sigurðar Helga

Magnús L. Sveinsson, stjórnarformaður Eirar, staðfesti í samtali við fréttastofu í morgun að Ríkisendurskoðun hefði verið falið að rannsaka kaupin á utanlandsferðinni. Þá staðfesti hann jafnframt að ósk hefði komið fram í stjórn Eirar um að ráðist yrði í heildarúttekt á framkvæmdastjóratíð séra Sigurðar Helga. "Það eru uppi hugmyndir um að fara í nánari úttekt á ferlinu en það er ekki búið að taka ákvörðun um það á þessu stigi," segir Magnús.

Vilhjálmur Þ. Vilhjálmsson hefur legið undir gagnrýni vegna aðkomu sinnar að rekstri Eirar en svo virðist sem Vilhjálmur hafi tekið við stöðu framkvæmdastjóra þegar staðan var þegar orðin grafalvarleg. Hann var hins vegar stjórnarformaður meðan séra Sigurður Helgi var framkvæmdastjóri. "Stjórnarmenn voru í góðri trú og Ríkisendurskoðun fór yfir alla reikninga, síðast fyrir árið 2011. Við vorum auðvitað ekki inni í daglegum rekstri. Við treystum því að þetta væri í lagi," sagði Magnús L. Sveinsson í samtali við fréttastofu, en hann tók við stjórnarformennsku í Eir af Vilhjálmi.

Vísar ásökunum á bug

Séra Sigurður Helgi sagði í samtali við fréttastofu að þessar ásakanir væru þvættingur. "Það er ekkert sem orkar tvímælis í rekstrinum," sagði hann. Hann vísaði ásökunum um sjálftöku og frændhygli á bug og sagði að heildverslunin hefði ekki verið í sinni eigu, heldur Skjóls, Eirar og Hrafnistu, hann hefði aðeins komið að stofnun hennar. Tilgangurinn hafi verið að annast sameiginleg innkaup á hjúkrunarvörum.

Sigurður Helgi segir að dóttur sín hafi verið í fæðingarorlofi þegar hann hafi látið af störfum. "Dóttir mín hóf störf þarna sem unglingur í ræstingum og hélt áfram eftir því sem tímar liðu. Það má segja að hún hafi unnið sig upp þannig."

Sigurður Helgi segist hafa gert grein fyrir flugfarseðlinum. "Þetta var bara greiðsla og ekkert óeðlilegt við hana á nokkurn hátt. Ég var spurður um þetta og gerði grein fyrir þessu."

Hvað með þá staðreynd að stjórnarmaður í Eir vill heildarúttekt á framkvæmdastjóratíð þinni hjá stofnuninni, er slík krafa bara úr lausu lofti gripin? "Ef mönnum finnst ástæða til þess að fara fram á slíkt, þá er það hið besta mál að þeir geri það."

Eins og fréttastofa Stöðvar 2 og Vísis hefur greint frá er fjárhagsstaða Eirar í molum, en eigið fé sjálfseignarstofnunarinnar er neikvætt um 385 milljónir og hún því í raun tæknilega gjaldþrota.

Óvíst er hvort ellilífeyrisþegar sem greiddu tugi milljóna króna fyrir íbúðarrétt hjá Eir fái peningana sína til baka þar sem íbúðirnar eru veðsettar lánastofnunum. thorbjorn@stod2.is