Styttist í þekktustu loftsteinadrífu jarðar

Loftsteinadrífan Leonídar nær hápunkti sínum um næstu helgi. Nokkrir tugir loftsteina munu þá sjást á klukkustund er þeir brenna upp í andrúmslofti jarðarinnar.

Drífan er kennd við halastjörnuna Temple Tuttle. Þegar slík fyrirbæri æða í átt að innra sólkerfinu skilja þær eftir sig ógnarlanga slóð af ís- og rykögnum.

Á 33 ára fresti ferðast jörðin í gegnum þessa slóð halastjörnunnar og öðru hverju geta þessar loftsteinadrífur orðið afar tilkomumiklar. Þessi tiltekna drífa hefur hlotið nafnið Leonídar.

Aðstæður til að sjá drífuna eru ákjósanlegar að þessu sinni enda mun tunglið ekki hafa teljandi áhrif á ljósasýninguna.

Drífan nær hápunkti sínum 17. og 18. nóvember. Áhugasömum er því bent á að taka daginn snemma, koma sér langt í burtu frá ljósum borgarinnar og beina augum að Ljóninu sem verður þá hátt á suðausturhimni.

Afar auðvelt er að bera kennsl á Ljónið en höfuðið þess markast af sex stjörnum sem mynda sigð en þangað munu loftsteinarnir einmitt stefna.

Hægt er að nálgast frekari upplýsingar um Ljónið og loftsteinadrífur ásamt öðrum fróðleik á Stjörnufræðivefnum.