Var óheimilt að stöðva flutning 150 bifhjóla til landsins

Umferðarstofa var í dag sýknuð af skaðabótakröfu fyrir héraðsdómi Reykjavíkur. Krafan var sprottin af því að tollafgreiðslu yfir 150 bifhjóla, sem stefnandi hugðist flytja til landsins, var hafnað vegna afstöðu Umferðarstofu árið 2004. Í kjölfarið var hjólunum komið fyrir í geymslu fram til ársins 2006 sem innflytjandinn mátti greiða fyrir. Hann fór fram á skaðabætur vegna þess.

Héraðsdómur féllst á það að „ekki hafi verið staðið að verki af hálfu stefnda með svo vönduðum hætti sem ætlast mátti til áður en hann afgreiddi erindi stefnanda.“ Ekki var sýnt fram á næg rök fyrir því að koma í veg fyrir tollafgreiðslu hjólanna.

Dómstóllinn féllst aftur á móti ekki á að Umferðarstofu bæri að bæta kostnað af geymslu hjólanna eftir að neitað var um tollafgreiðslu. Ástæðan var helst tómlæti innflytjandans, en hann hefði getað stuðlað að því að hjólin væru tollafgreidd mun fyrr en gert var. Honum tókst því ekki að sýna fram á að nauðsynlegt hefði verið að hafa þau í geymslu allan þann tíma sem málið tók til.