Almannavarnir vara við óveðri suðvestanlands í dag

Almannavarnir vara við suðaustan óveðri um suðvestanvert landið með morgninum og á norðanverðu Snæfellsnesi þegar líða tekur á morguninn.

Vindhraði getur orðið allt að 28 metrum á sekúndu og farið yfir 40 metra í hviðum. Vindur verður í hámarki til klukkan tíu, að minnsta kosti, eða á þeim tíma sem fólk er að fara til vinnu og eru foreldrar beðnir að fylgja börnum sínum í skóla.

Búist er við að hvassast verði í efri byggðum Reykjavíkur og Kópavogs og í Vallahverfinu og Áslandi í Hafnarfirði.

Í öðrum landshlutum má búast við 15 til 23 metra vindi á sekúndu og mikilli úrkomu suðaustanlands. Mikil slydda hefur verið á Klaustri í nótt og frostrigning á Höfn.