Neita allri vitneskju um kókaín í töskum

Um þrjú kíló af kókaíni fundust í töskum tveggja íslenskra stúlkna sem lentu á flugvellinum í Prag á miðvikudag. Stúlkurnar, sem eru báðar átján ára hafa neitað sök í málinu, en voru á föstudag engu að síður úrskurðaðar í sjö mánaða gæsluvarðhald.

Stúlkurnar fóru frá Íslandi í ágúst. Í síðustu viku flugu þær frá Sao Paulo í Brasilíu áleiðis til Prag með viðkomu í München í Þýskalandi. Þrátt fyrir grunsemdir þar um að stúlkurnar hefðu eitthvað misjafnt í fórum sínum voru þær látnar fljúga óáreittar áfram til Tékklands til að reyna koma yfirvöldum á spor hugsanlegra samverkamanna en sú áætlun gekk ekki eftir. Eftir tímafreka leit á flugvellinum í Prag fannst síðan efnið sem talið er vera kókaín.

Samkvæmt heimildum Fréttablaðsins hafa stúlkurnar borið að töskurnar séu gjöf frá Bandaríkjamanni sem þær hafi kynnst á Íslandi. Sá maður var hér á landi þar til honum var vísað á brott þar sem dvalarleyfi hans var útrunnið.

"Þegar tvær átján ára stúlkur lenda í svona ógæfu reynum við auðvitað að bregðast við eins og jafnan," segir Össur Skarphéðinsson utanríkisráðherra um aðkomu ráðuneytisins að máli stúlknanna. "Bæði höfum við verið í sambandi við foreldra þeirra og okkar maður á staðnum hefur hitt þær báðar. Einnig höfum við tryggt að þær fái verjendur."

Stúlkurnar höfðu ætlað frá Tékklandi til Kaupmannahafnar með lest en sitja nú hvor í sínu fangelsinu í Prag. Talið er að þrír mánuðir hið minnsta líði þar til dómur gengur í máli þeirra. Verði stúlkurnar sekar fundnar mun lágmarks refsing hljóða upp á fimm til átta ára fangelsisvist.

Útlitið er því ekki bjart og staðan batnar heldur ekki við það að aðbúnaðurinn í tékkneskum fangelsum er fremur slæmur. Þá er enginn framsalssamningur í gildi milli Íslands og Tékklands og því ekki um það að ræða að stúlkurnar fái að afplána hugsanlega dóma hér heima á Íslandi.

Össur Skarphéðinsson segir mál eins og þetta afar erfið fyrir aðstandendur, ekki síst þegar um sé að ræða kornungt fólk. "Það auðvitað veldur miklu angri. Við erum boðin og búin að gera það sem í okkar valdi stendur til að greiða götu þeirra en því miður getum við ekki hrifið menn út úr fangelsum eða varðhaldi eins og þessar stúlkur hafa verið úrskurðar í – en við gerum okkar besta," segir utanríkisráðherra.

gar@frettabladid.is