Neyðarskilaboð klukkan 16 í dag

Klukkan fjögur í dag verður prófað viðvörunarkerfi almannavarna, sem sendir neyðar-sms-skilaboð í farsíma. Skilaboðin verða send á alla farsíma, bæði innlend og erlend númer, sem eru á þjónustusvæði símafyrirtækjanna í Vík í Mýrdal. Þau verða send úr númerinu 112 og verða á íslensku og ensku.

Í tilkynningu frá almannavörnum segir að tilgangurinn með kerfinu sé að vara íbúa og ferðamenn við aðsteðjandi hættu. Kerfið sé mikilvægt skref í að auka öryggi íbúa landsins og ferðamanna.