Guðgeir sýndi engin svipbrigði - Skúli missti 50 lítra af blóði

Guðgeir Guðmundsson sýndi engin svipbrigði þegar fulltrúi ríkissaksóknara las yfir ákæruatriðin gegn honum í Héraðsdómi Reykjavíkur fyrir stundu. Guðgeir er ákærður fyrir tilraun til manndráps er hann stakk Skúla Eggert Sigurz fimm sinnum með hníf þegar hann réðist á hann á lögfræðistofunni Lagastoðum í mars síðastliðnum, þar af voru fjórar stungur lífshættulegar.

Í árásinni missti Skúli mikið blóð og þurfti meðal annars að fjarlæga annað nýrað úr honum eftir árásina. Í ákærunni kemur fram að eftir árásina, og á meðan Skúli var í aðgerð, láku alls 50 lítrar af blóði úr líkama hans. Þetta er margfalt sá lítrafjöldi sem er í mannslíkamanum og þýðir að strax eftir árásina hefur hjúkrunarfólk margsinnis þurft að dæla blóði inn í hann.

Skúli krefur Guðgeir um 3 milljónir króna í miskabætur. Guðgeir er einnig ákærður fyrir sérstaklega hættulega líkamsárás fyrir að hafa stungið Guðna Bergs tvívegis í lærið þegar hann kom Skúla til aðstoðar. Guðni krefur Guðgeir um rúma milljón í miskabætur.

Verjandi Guðgeirs sagði að Guðgeir vildi taka sér frest til þess að fara yfir ákæruatriðin og taka afstöðu til þeirra. Málinu var því frestað þar til á fimmtudaginn næsta.