SUS sakar Kristján og Tryggva um að kaupa sér atkvæði

Samband ungra sjálfstæðismanna gagnrýnir þingmenn Sjálfstæðisflokksins í Norðausturkjördæmi harðlega fyrir að hafa samþykkt gerð Vaðlaheiðarganga á þingi í gær. Í ályktuninni er þeim Kristjáni Þór Júlíussyni og Tryggva Þór Herbertssyni óskað til hamingju með að hafa keypt sér endurkjör á næsta kjörtímabili, eins og það er orðað. Ungir sjálfstæðismenn bæta því við að verðið sem þeir greiði fyrir endurkjörið, 8,7 milljarðar, komi reyndar ekki úr þeirra vösum, heldur renni það úr vösum skattgreiðenda.

„Það er blekkingarleikur að halda því fram að um einkaframkvæmd sé að ræða. Ef svo væri þyrfti Alþingi enga aðkomu að hafa að málinu. Staðreyndin er hinsvegar sú að fyrirtækið sem mun gera og reka göngin er í meirihlutaeigu ríkisins auk þess sem Alþingi hefur nú ákveðið að lána 8,7 milljarða úr vasa skattgreiðenda til verkefnisins. Öll áhætta af verkefninu liggur því hjá ríkinu," segir ennfremur.

„Ungir sjálfstæðismenn vilja að sem flestar samgöngubætur verði einkaframkvæmdir, þar sem einkaaðilar myndu sjá alfarið um fjármögnun, byggingu og rekstur samgöngumannvirkja. Mikilvægt er að því fé sem ríkið ver til vegamála sé ráðstafað með málefnalegum og eðlilegum hætti í samræmi við samþykktar vegaáætlanir, en að sérstök gæluverkefni séu ekki tekin fram fyrir röð, eins og gert hefur verið með Vaðlaheiðargöng.

Á sama tíma og ungir sjálfstæðismenn átelja Kristján Þór Júlíusson og Tryggva Þór Herbertsson fyrir að styðja þetta mál þá fagna þeir því að aðrir þingmenn flokksins hafi ekki greitt atkvæði með því við lokaafgreiðslu málsins," segir einnig.