Laxveiðin fer mjög vel af stað

Sautján laxar komu á land í Norðurá og Blöndu í morgun en laxveiðitímabilið hófst formlega í dag með opnun þessarra tveggja áa.

Fyrsta lax dagsins var landað í Norðurá klukkan 7.22 eða þegar rétt um 22 mínútur voru liðnar af laxveiðisumrinu. Það var Bjarni Júlíusson, formaður Stangaveiðifélags Reykjavíkur, sem landaði þá um 10 punda, grálúsugri hrygnu. Þegar laxalús er á fiski gefur það til kynna að hann sé nýgenginn úr sjó því lúsin lifir aðeins í saltvatni og drepst því fljótlega eftir að lax gengur upp í ár.

Á fyrri vaktinni í Norðurá, sem lauk klukkan eitt, veiddust samtals 11 laxar og voru þeir stærstu á bilinu 11 til 13 pund. Fiskarnir voru allir veiddir á flugu enda er annað agn bannað í ánni. Þetta er besta byrjun á veiði í Norðurá á þessari öld.

Í Blöndu veiddust sex laxar í morgun og flestir þeirra á maðk. Aðstæður voru nokkuð í morgun. Mikill vindur og hiti ekki nema um 4 til 5 stig. Fiskarnir í Blöndu voru allir mjög vænir og sá stærsti vó 17 pund.

Veiðimenn í Norðurá og Blöndu halda aftur til veiða klukkan fjögur, en í laxveiði er nánast undantekningalaust veitt á tveimur vöktum. Annars vegar frá sjö til eitt og hins vegar fjögur til tíu. Það verður spennandi að sjá hvernig veiðideginum lýkur.

Hægt er að fylgjast nánar með þróun mála á Veiðivísi.