Ný tækni í sýnatöku í brjóstholi

Hafin er söfnun fyrir berkjuómspeglunartæki fyrir Landspítalann. Um er að ræða tæki sem notað er til sýnatöku úr eitlum í brjóstholi.

Tómas Guðbjartsson, hjarta- og lungnaskurðlæknir, segir tækið mikilvægt. „Þetta er tækni sem hefur verið notuð í öllum nágrannalöndunum í nokkur ár og er orðinn hluti af almennri uppfærslu,“ segir Tómas.

Tómas segir að nú þurfi að framkvæma opna skurðaðgerð neðst á hálsi til að taka sýni úr eitlum sem liggja mitt á milli lungnanna. Slíkt krefst svæfingar og innlagnar.

Með nýja tækinu þarf aðeins að staðdeyfa sjúkling í kokið og hann er útskrifaður samdægurs.

Þar að auki er nýja tækið sagt vera mun nákvæmara, hægt sé að fara dýpra ofan í brjóstholið og taka sýni úr nákvæmlega þeim eitli sem sé stækkaður.

Tómas segist vera vongóður um að söfnunin gangi vel. „Stefnan er sett á að við getum átt svona tæki í haust.“ - ktg