Kalli í Pelsinum setur Apótekið á sölu

Karl J. Steingrímsson, betur þekktur sem Kalli í Pelsinum, hefur boðið Austurstræti 16 eða Apótekið til sölu eða leigu. Húsið er fimm hæðir auk kjallara og rishæðar, alls einir 2773 fermetrar.

„Þetta eru miklar tilfinningar," segir Karl sem getur ekki gefið neina verðhugmynd á þessu stigi málsins. „Það gerist ekki neitt fyrr en maður fær tilboð," segir Karl. Enn sem komið er hafa engin tilboð borist en nokkuð er um fyrirspurnir.

Eignin eins og hún leggur sig er til sölu en Karl gæti þó einnig hugsað sér að selja hluta hússins í einu. „Maður vill detta niður á einhvern sem langar að eiga húsið," segir Karl.

Slitastjórn Landsbankans hefur verið til húsa í efri hæðum hússins. Nú í október rennur sá samningur út og því vill Karl koma húsinu í nýjar hendur.

Karl birti auglýsingu í Fréttablaðinu í dag. Þar er húsinu lýst sem einni af perlum íslenskrar byggingarlistar. Um er að ræða fyrsta stórhýsi Guðjóns Samúelssonar sem teiknaði á ferli sínum margar af þekktustu byggingum landsins m.a. aðalbyggingu HÍ og gamla Landspítalann.

Húsið var byggt á árunum 1916-1918. Reykjavíkurapótek og Bæjar- & Borgarskrifstofur voru í húsinu upp úr 1929 þar til Ráðhúsið var tekið í notkun og apótekið lagði niður starfsemi 1999. Frímúrarareglan hafði samkomusal í húsinu og enn má sjá merki þeirra á gafli hússins.