Drasli fleygt við yfirgefna lóð

Nokkuð hefur borið á því að rusli og drasli sé fleygt við hlið gömlu starfsstöðvar Sorpu við Miðhraun í Garðabæ. Þar er engin starfsemi eins og stendur.Þegar ljósmyndara bar að garði síðdegis í gær stóð sófi á gangstéttinni við hliðið. Það er ekki fyrsta mublan sem þar hefur verið skilin eftir. Sorpa lokaði starfsstöðinni um áramótin 2009-2010 og hefur hún verið lokuð síðan. Þar er jafnframt skilti sem bendir rusleigendum á að ný starfsstöð Sorpu fyrir svæðið sé á Breiðhellu í Hafnarfirði.

Samkvæmt upplýsingum frá Garðabæ er það bæjarins að hirða rusl við og á götum bæjarins. Allar ábendingar um drasl séu vel þegnar. Ruslahirðunni fylgir þó kostnaður fyrir bæinn.

Samkvæmt upplýsingum frá Sorpu segir að eitthvað beri á því, strax eftir að stöðvum hefur verið lokað, að fólk skilji rusl eftir við hliðið. Stöðin við Miðhraun hefur verið lokuð í rúm tvö ár.- bþh