Bolungarvík krefst þess að ráðuneyti virði samninga

Bolungarvíkurkaupstaður hefur sent innanríkisráðuneytinu erindi og krafist niðurfellingar tugmilljóna skulda á félagslegu húsnæði. Samningur er til þar um. Íbúðalánasjóður hafnar niðurfellingunni.

Sveitarstjórn Bolungarvíkur hefur sent innanríkisráðuneytinu erindi þar sem þess er krafist að staðið verði við samkomulag um frekari niðurfellingu skulda á félagslegu íbúðarhúsnæði í sveitarfélaginu. Sveitarfélagið gerði samning við eftirlitsnefnd með fjármálum sveitarfélaganna þess efnis. Bolungarvík hefur staðið við sinn hluta samkomulagsins.

Samkomulagið, sem gert var í lok árs 2008 og byrjun 2009, gerir ráð fyrir því að Bolungarvík grípi til ýmissa aðgerða, svo sem niðurskurðar, frestunar á þegar gerðum framkvæmdasamningum, álagi á útsvar og hækkun á þjónustutekjum. Á móti yrði 146 milljón króna skuld á félagslegu íbúðarhúsnæði aflétt.

Nefndin leitaði eftir aðgerðum Íbúðalánasjóðs og stjórn hans samþykkti í janúar 2009 að afskrifa að fullu helming þeirrar upphæðar, eða 73 milljónir. Afborganirnar af öðrum 73 milljónum yrðu frystar í eitt ár. „Að því tímabili loknu verði málið tekið til endurskoðunar í samráði við eftirlitsnefndina og viðkomandi ráðuneyti.“

Þegar leitað var eftir því að afgangur upphæðarinnar yrði felldur niður hafði ný stjórn Íbúðalánasjóðs tekið við. Hún hafnaði erindinu.

Eftirlitsnefndin er harðorð um málið í ársskýrslu sinni fyrir árið 2011, en þar segir: „Það er alvarlegt þegar opinber aðili getur ekki staðið við þau fyrirheit, sem hann tók að sér að hafa milligöngu um með samkomulagi við lánardrottna, sökum þess að ríkisstofnun – í þessu tilviki Íbúðalánasjóður – telur sig ekki bundna af því samkomulagi sem gert var.“

Sigurður Erlingsson, framkvæmdastjóri Íbúðalánasjóðs, segir sjóðinn aldrei hafa verið aðila að þessu samkomulagi og þar af leiðandi ekki bundinn af því. Það sé í raun alvarlegt mál að opinber aðili eins og eftirlitsnefndin geti gert samning um aðgerðir Íbúðalánasjóðs án hans aðkomu.

Sigurður segir stöðu eignanna í raun þannig í dag að þær standi undir sér. Þá sé Íbúðalánasjóður bundinn af tilmælum um að fylgja Beinu brautinni í aðgerðum í skuldamálum. Samkvæmt henni megi ekki mismuna kröfuhöfum, en sú yrði reyndin ef farið væri eftir samkomulaginu. Þá greinir nefndina og sjóðinn á um raunverulega stöðu sveitarfélagsins.

„Við kynntum nefndinni okkar mat um að staða sveitarfélagsins væri mun alvarlegri en þeir teldu hana vera og þar af leiðandi teldum við að frekari aðgerða væri þörf. Við höfum ítrekað boðið þeim að fara í Beinu brautina, þar sem jafnræði kröfuhafa verði gætt. Því hefur ekki verið sinnt.“

kolbeinn@frettabladid.is