Cothran á batavegi

Keith Cothran, sem lék með Stjörnunni í körfuknattleik í vetur, er á batavegi eftir að hafa verið skotinn í höfuðið í síðustu viku. Hann er nú farinn að standa upp úr rúmi sínu og gengur um á spítalanum sem hann dvelur á. Læknar eru vongóðir um að hann nái sér að fullu.

Cothren, sem er tuttugu og sex ára, lék tuttugu og níu leiki með Stjörnunni í vetur og skoraði að meðaltali 17,3 stig. Á miðvikudaginn í síðustu viku var skotið á hann þar sem hann sat í bíl sínum á bílastæði í bænum Hamden í Connecticut í Bandaríkjunum. Eitt af skotunum hæfði hann í höfuðið en hann náði þó að koma sér á bensínstöð í grendinni og biðja um hjálp.

Lögreglan rannsakar nú árásina en hefur ekki enn handtekið neinn. Cothren vakti mikla athygli í bæ sínum fyrir nokkrum árum þegar hann sló í gegn með háskólaliði sínu en áður hafði hann verið í óreglu. Hér er hægt að sjá frétt sem bandarísk sjónvarpsstöð gerði um hann fyrir nokkrum árum.