Á annan veg endurgerð í Bandaríkjunum - Hollywood-stjarna í aðalhlutverki

„Það er búið að skjóta myndina en við getum ekki tjáð okkur um þetta fyrr en við fáum grænt ljós frá þeim í Bandaríkjunum," segir Davíð Óskar Ólafsson, einn af framleiðendum íslensku gamanmyndarinnar Á annan veg.

Myndin hefur verið endurgerð af bandarísku kvikmyndafyrirtæki og er búist við að hún komi út á næstu misserum. Á vefnum Twitchfilm segir að bandaríski titill myndarinnar verði Prince Avalanche. Endurgerðin var meðal annars tekin upp í Austin í Texas í síðasta mánuði og leikstýrir leikstjórinn David Gordon Green myndinni, en hann gerði meðal annars myndina Pineapple Express.

Leikarinn Paul Rudd fer með eitt aðalhlutverkið í myndinni ásamt Emile Hirsch. Rudd hefur leikið í mörgum þekktum myndum síðustu ár, þar á meðal The 40 year old virgin, I Love You, Man, Role Models, Knocked Up og síðan en ekki síst The Anchorman þar sem hann fór með eitt af aðalhlutverkunum.

Á annan veg kom út í fyrra hér á landi og fékk góða dóma hjá gagnrýnendum. Myndin er meinfyndin og mannleg kómedía sem segir gerist upp úr 1980. Tveir ungir menn starfa við vegavinnu á afskekktum fjallvegum, handmála merkingar á malbik og reka niður tréstikur í vegkanta. Þeir hafa ekkert nema hvorn annan og tilbreytingalausa vinnuna - sem væri kannski allt í lagi ef þeim líkaði betur hvor við annan.

Það var Hafsteinn Gunnar Sigurðarson sem leikstýrði myndinni.

Hægt er að sjá trailer úr myndinni hér.