Eygir í málslok hjá Viggó eftir fimm ára rannsókn

Eftir fimm ára rannsókn sér nú loks fyrir endann á máli fyrrverandi framkvæmdastjóra Verðbréfaþjónustu sparisjóðanna (VSP), Viggós Þóris Þórissonar, sem hefur verið ákærður fyrir umboðssvik og tilraun til fjársvika, en aðalmeðferð í máli hans stendur nú yfir.

Aðalmeðferð stendur nú yfir í Héraðsdómi Reykjaness í máli ákæruvaldsins gegn Viggó en málið hefur verið til rannsóknar í tæp fimm ár, eða frá apríl 2007, þegar stjórnendur fyrirtækisins tilkynnti lögreglu um ætlaða refsiverða háttsemi Viggós þar sem grunur lék á að hann hefði falsað skjöl, sem áttu að vera frá fyrirtækinu en voru það ekki. Var honum í kjölfarið sagt upp störfum og rannsókn hafin á málinu.

Viggó er grunaður um að hafa gefið út falsaða yfirlýsingu vegna ábyrgðar á skuldabréfaútboði félagsins Napis Incorporated í kauphöllinni í Guernsey. Ábyrgðaryfirlýsingin setti VSP í ábyrgð fyrir 200 milljónum dollara, en í yfirlýsingunni kom fram að Napis ætti hlutabréf, verðbréf eða peningainnistæðu að verðmæti um 680 milljónir dollara, jafnvirði rúmlega 80 milljarða króna, á reikningum hjá VSP. Þær innistæður voru hins vegar ekki til.

Stórfelld fjártjónshætta

Með þessa ábyrgðaryfirlýsingu að vopni gaf Napis út skuldabréf í Guernsey. Helsti eigandi Napis er David Spargo, gamall skólafélagi Viggós, en Viggó var sjálfur skráður fyrir 25 prósenta hlut í Napis.

Yfirlýsingin fólst í ábyrgð VSP á skuldabréfaútboði Napis, en þetta er talið hafa falið í sér stórfellda fjárstjónshættu fyrir VSP.

Reynt var að taka lán út á ábyrgðaryfirlýsinguna í Filippseyjum, Bretlandi og víðar. Ekki varð tjón vegna ábyrðgaryfirlýsingarinnar en umboðssvik eru svokallað hættubrot sem þýðir að það er nóg til sakfellingar að háttsemin hafi valdið fjártjónshættu.

Íslandsmet í farbanni

Viggó var úrskurðaður í farbann um leið og málið komst upp og var það ítrekað framlengt þar til Hæstiréttur felldi farbannið úr gildi í mars 2009. Hann var því alls 23 mánuði í farbanni og hefur enginn Íslendingur mátt sæta farbanni svo lengi.

Rannsóknin tafðist mjög lengi vegna gagna sem ekki bárust frá útlöndum. Þá fóru rannsakendur á vegum efnahagsbrotadeildar ríkislögreglustjóra ítrekað erlendis vegna rannsóknarinnar en meðal gagna í málinu er skýrslutaka af David Spargo sem tekin var í Bandaríkjunum.

Með nýjan verjanda

Viggó naut aðstoðar Sveins Andra Sveinssonar sem hafði stöðu verjanda hans á rannsóknarstigi málsins. Hann hefur hins vegar skipt um verjanda og nú er það Vífill Harðarson, hrl. á Juris lögmannstofu, sem gætir hagsmuna hans í málinu.

Í kjölfar aðalmeðferðar verður málið dómtekið en samkvæmt lögum um meðferð sakamála þarf niðurstaða að liggja fyrir innan fjögurra vikna.