Icelandair tapaði fjórum milljörðum en samt með mettekjur

Þrátt fyrir tapið skilaði félagið inn mestu tekjum,61,4 milljörðum króna, sem það hefur gert á öðrum ársfjórðungi.

EBIT var neikvætt um 3,7 milljarða króna, samanborið við jákvætt EBIT um 102,9 milljónir króna á fyrra ári, aðallega vegna hækkunar eldsneytiskostnaðar

Í tilkynningu segir að undirliggjandi rekstrarbati hafi verið án áhrifa hækkunar eldsneytiskostnaðar, sem jókst um níu milljarða króna milli ára, eða um 5,1 milljarð króna að teknu tilliti til áhrifa eldsneytisvarna

Þar segir einnig að horfur fyrir þriðja ársfjórðung séu góðar, og að búist sé við EBIT rekstrarbata og met einingatekjum

„Rekstrarumhverfið var krefjandi á öðrum ársfjórðungi vegna mikillar hækkunar eldsneytisverðs. Við náðum samt sem áður góðum árangri á mörgum sviðum og var afkoman í takt við afkomuspá okkar fyrir fjórðunginn. Við skiluðum met tekjum og ef hækkun eldsneytiskostnaðar er tekin út fyrir sviga náðum við undirliggjandi EBIT rekstrarbata á milli ára. Tekjur á hvern seldan sætiskílómetra hækkuðu og var sætanýting, ásamt stundvísi, áfram góð. Til að bregðast við krefjandi aðstæðum höfum við aðlagað framboð, hækkað fargjöld, lagt mikla áherslu á kostnaðaraðhald og ákveðið að hætta rekstri Boeing 757 flugvéla fyrr en áætlað var,“ er haft eftir Boga Nils Bogasyni forstjóra Icelandair.

„Tekjuhorfur á þriðja ársfjórðungi eru góðar og gerum við ráð fyrir að einingatekjur verði þær hæstu í sögu félagsins. Eftirspurn er mikil til og frá Íslandi, og nær hápunkti til Íslands í kringum sólmyrkvann í ágúst. Þá gerum við ráð fyrir að EBIT í þriðja ársfjórðungi muni batna milli ára.“

Þá segir hann að félagið muni halda áfram að endurnýja flugflota sinn, innan skamms sé von á nýjum flugvélum sem muni opna ný tækifæri og styrkja leiðakerfið.

„Til þess að nýta þessi tækifæri til fulls er nauðsynlegt að félagið sé samkeppnishæft á öllum sviðum rekstrarins. Hluti af því er að tryggja að nýir kjarasamningar styðji við langtímaáætlanir félagsins á sama tíma og við höldum áfram að bjóða upp á eftirsótt flugstörf á Íslandi og góðar starfsaðstæður. Einnig er mikilvægt að áform okkar um að ná betri stjórn á árstíðasveiflunni í rekstrinum gangi eftir. Allt miðar þetta að því að efla tengimiðstöðina í Keflavík og starfsemi okkar á Íslandi,“ segir Bogi.

„Fjárhagsstaða félagsins er sterk sem gerir okkur kleift að bregðast við síbreytilegu rekstrarumhverfi og á sama tíma fjárfesta í framtíðarvexti. Ég vil þakka viðskiptavinum okkar fyrir traustið og starfsfólki okkar fyrir frábær störf. Þau eru grunnurinn að árangri félagsins.“

Fréttin hefur verið uppfærð.