Verjendur Annþórs og Barkar kæra til Hæstaréttar

Verjendur Annþórs Kristjáns Karlssonar og Barkar Birgissonar munu kæra úrskurð Héraðsdóms Suðurlands, um að vitni fái að gefa skýrslu nafnlaust í máli gegn þeim, til Hæstaréttar. Annþór og Börkur eru grunaðir um að hafa orðið Sigurði Hólm Sigurðssyni, samfanga sínum, að bana á Litla Hrauni í vor. Þeir hafa að auki verið sökuð um fjölmörg alvarleg ofbeldisbrot, framin á liðnu ári á höfuðborgarsvæðinu.

Héraðsdómur Suðurlands úrskurðaði í morgun að vitni í málinu gegn þeim gæti komið fram nafnlaust. Hólmgeir Elías Flosason, verjandi Annþórs, sagði í samtali við Vísi nú á fjórða tímanum, að niðurstaðan yrði kærð til Hæstaréttar. Hann sagðist þekkja eitt dæmi um að héraðsdómur hefði komist að sömu niðurstöðu og Héraðsdómur Suðurlands hefði komist að í dag. Í því tilfelli hefði Hæstiréttur snúið niðurstöðu héraðsdóms við.

Fram kom í fréttum RÚV í dag að dómari við Héraðsdóm Suðurlands hefði hafnað kröfu þeirra Annþórs og Barkar um að handjárn yrðu tekin af þeim inni í réttarsal. Verjandi Annþórs staðfesti þá frásögn í samtali við Vísi.