Cisse: Yrði sæt hefnd fyrir Hughes að vinna Man. City

Rimma QPR og Man. City er áhugaverð fyrir margar sakir og ekki síst fyrir þá staðreynd að þar þarf City að leggja stjórann sem var rekinn frá City til þess að koma Roberto Mancini að.

Sá heitir Mark Hughes og er þess utan goðsögn hjá Man. Utd. QPR er þess utan enn að reyna að forðast fall úr úrvalsdeildinni.

"Það yrði sæt hefnd fyrir Hughes að vinna leikinn," sagði Djibril Cisse, framherji QPR. "Ég held samt að hann sé ekkert að hugsa um hefnd. Aðalmálið hjá honum er að halda QPR í deildinni en það yrði samt sætt fyrir hann að leggja City af velli."

Cisse skoraði gríðarlega mikilvægt sigurmark gegn Stoke um síðustu helgi sem lyfti QPR úr fallsæti en ekki fallhættu.