NASA - hugleiðing

Þegar ég las greinina hans Páls Óskars þar sem hann sagði frá því búið væri að segja upp samning við staðarhaldara NASA og allt bendir til þess að NASA verði ekki starfrækt sem tónleikahús, varð ég að skrifa smá um málið.

Ég veit að margt tónlistarfólk grætur það að NASA muni ekki starfa sem tónlistar- og ballstaður. Sjálf er ég ekki tónlistarmaður (þrátt fyrir að syngja í kór!) en ég nýt þess að fara á tónleika og skrifa því sem slík. Ég og maðurinn minn erum mjög dugleg að fara á tónleika og þegar ég veit að ég er að fara á tónleika á NASA hlakka ég alltaf mikið til ekki bara vegna tónlistarinnar heldur elska ég allt við NASA.

Í fyrsta lagi er stemningin yndisleg, borðin, stólarnir, sviðið, upplýstu myndirnar af sjávardýrum og sérstaklega bleika mósaík kvennaklósettið (veit ekki hvernig karla wc lítur út en það er örugglega jafn frábært).

Í öðru lagi er NASA yndislegur staður í alla staði og það er hrein unun að fara þangað á tónleika. Í þriðja lagi hefur staðurinn sérstöðu, enginn staður kemur í staðinn fyrir NASA eins og Páll Óskar talar um i sinni grein. Persónulega finnst mér alltaf mikil og góð stemning á tónleikum þar og það er mín tilfinning að það sé örugglega mjög gaman að troða upp þar.

Í okkar samfélagi er mikið talað um auð, peninga og virði hins og þessa í krónum talið. Í orðinu auður fellst ekki bara skilgreining um krónur og aura heldur einnig er auður t.d. í fólki, mannviti o.s.frv. Annað hugtak um auð er félagsauður (social capital). Þegar talað er um félagsauð er ein merking þess sá auður sem við öll sem hópur höfum skapað saman, oft ósýnilegt en við finnum í gegnum samkennd, gleði og vellíðan og þannig njótum ávaxta þessa auðs sem við höfum skapað saman. Þegar ég fer inn á NASA þá dettur mér þetta hugtak í hug.

NASA er ekki bara tónleikahús heldur einnig ballstaður fyrir bæði fullorðna, börn og unglinga og þar finnur maður svo sannarlega fyrir þessum auði sem hefur skapast vegna okkar og með okkur. Ég vil hvetja okkur öll til að huga að þessum auði og samkennd sem við eigum og sköpum saman í samfélaginu okkar. Förum að sjá og virða meira félagsauðinn sem við Íslendingar eigum. Það er mín persónulega skoðun að við missum mikið ef NASA verður ekki til staðar.

Eigum við ekki að gera eitthvað í þessu og passa uppá auðinn okkar? Berjumst fyrir NASA!