Skuldir íslenskra heimila lægri en í Danmörku og Hollandi

Skuldir heimila á Íslandi sem hlutfall af landsframleiðslu minnkuðu um átta prósent í fyrra á sama tíma og kaupmáttur jókst um tæplega fjögur prósent. Skuldir heimila hér á landi í hlutfalli við ráðstöfunartekjur eru nú minni en í bæði Danmörku og Hollandi.

Eftir hrun fjármálakerfisins og krónunnar, haustið 2008, hækkuðu skuldir íslenskra heimila skarplega og voru þær hæstu í Evrópu í hlutfalli við ráðstöfunartekjur. Í Fjármálastöðugleikariti Seðlabanka Íslands, sem kynnt var í gær, kemur fram að skuldirnar hafi lækkað um átta prósent að raunvirði í fyrra og er staðan nú sú að skuldir heimila hér á landi eru nú minni en bæði í Danmörku og Hollandi, en eftir hrunið hækkuðu skuldirnar upp fyrir báðar þessar þjóðir.

Skuldirnar eru þó enn háar og mælast nú um 240 prósent af ráðstöfunartekjum, en í Noregi og Svíþjóð er þetta sama hlutfall frá 150 til 170 prósent.

Í riti Seðlabankans segir að allt bendi til þess að skuldir íslenskra heimila í hlutfalli við ráðstöfunartekjur muni halda áfram að lækka, samhliða almennum efnahagsbata.

Staðan er þó enn viðkvæm þar sem vanskil íslenskra heimila í íslenska bankakerfinu eru enn mikil. Þá eru versnandi verðbólguhorfur til þess fallnar að hækka verðtryggðar skuldir og vaxtakostnað einnig, til lengri tíma litið.

Sjá má fjármálastöðugleikarit Seðlabanka Íslands, sem kynnt var í gær, hér.