Segir það ígildi Hells Angels að efast um frumvörp ríkisstjórnarinnar

„Það er ígildi Hells Angels að voga sér að efast um gildi frumvarpanna," sagði Ólöf Ýr Lárusdóttir, framkvæmdastjóri Vélfags á Ólafsfirði, en hún hvetur almenning til þess að kynna sér kvótafrumvörpin. Það hafi hún gert án aðstoðar LÍÚ eins og hún orðaði það sjálf. Hún sagði ennfremur að henni hefði brugðið við að sjá sama tóninn í öllum þeim umsögnum sem hafa verið gerðar um frumvörpin, „þessi frumvörp eru vanhugsuð og gerð í fljótfærni," bætti hún við.

Hún sagði algjört virðingaleysi við sjómenn og þá sem koma að sjávarútvegi með því að fullyrða að þeir væru einhverskonar strengjabrúður útvegsmanna.

„Og ef fólk vogar sér að leika í auglýsingum er það nítt niður," sagði Ólöf Ýr og vitnaði þar til umdeildra auglýsinga útgerðarmanna.

Undir ræðu Ólafar mátti heyra kröftug mótmæli þeirra sem eru fylgjandi frumvörpum um fiskveiðistjórnunarkerfið. Ólöf bað þau ítrekað um að hætta að „úa" enda sjálf ekki á vegum LÍÚ.