Ætlar ekki að láta undan þrýstingi útgerðarmanna

Steingrímur J. Sigfússon, sjávarútvegsráðherra, segir Alþingi muni ekki láta undan þrýstingi útgerðarmanna í kvótamálinu. Meirihluti þingmanna styður frumvarp um hækkun veiðigjalda.

Mótmæli útgerðarmanna voru rædd í fyrirspurnartíma á alþingi í morgun. Einar K. Guðfinnsson, þingmaður sjálstæðisflokks, sagði að ríkisstjórninni hafi mistekist að skapa sátt um breytingar á kvótakerfinu.

„Það hlýtur að blasa við hæstvirtum sjávarútvegs- og landbúnaðarráðherra, eins og það blasir við þjóðinni, að tilraun ríkisstjórnarinnar til þess að leiða þessi mál til lykta, og til þess að draga úr þessum deilum hefur greinilega ekki tekist. Og þess vegna erum við í þessari stöðu," sagði Einar á Alþingi í dag.

Steingrímur sagði að það væri Alþingis en ekki útgerðarmanna að ákveða framhald málsins.

„Niðurstöður í löggjafarstörfum eiga ekki að ráðast af þrýstingsaðgerðum fjársterkra sérhagsmunahópa. Ég segi fyrir mig persónulega, hef sagt það áður opinberlega og get endurtekið það hér, ég mun reyna vanda mig við að láta stórútgerðamenn ekki gjalda þessara aðgerða þó mér þykir þær ekki viðeigandi. En ég mun sannanlega ekki láta þá njóta þeirra heldur," sagði Steingrímur á Alþingi í dag.

Meirihluti alþingismanna styður frumvarp um hækkun veiðigjalda en þó eru sumir sem vilja ganga lengra.

Allur þingflokkur samfylkingarinnar er fylgjandi málinu sem og ellefu þingmenn vinstri grænna. Guðmundur Steingrímsson styður einnig málið og þingmenn Hreyfingarinnar. Samanlagt eru þetta 35 þingmenn.

Þingmenn Sjálfstæðisflokks eru á móti frumvarpinu sem og þingflokkur framsóknarmanna - eða tuttugu og fimm þingmenn.

Afstaða þriggja þingmanna liggur ekki endanlega fyrir, það er Atla Gíslasonar, Lilju Mósesdóttur og Jóns Bjarnasonar.

Hitt kvótafrumvarpið - sem snýr að breytingum á stjórn fiskveiða - er umdeildara en samkvæmt heimildum fréttastofu er ekki útilokað að því máli verði frestað fram á haust.