Heldur upp á 50 ára afmælið fyrir norðan

Stórleikarinn Tom Cruise ætlar að halda upp á fimmtugsafmælið sitt í glæsivillunni Hrafnabjörgum á Vaðlaheiði í sumar. Talið er að hann og fjölskylda hans verði komin hingað til lands um helgina.

Frá þessu greinir Akureyri Vikublað í dag. Þar er fullyrt er að Thomas Martin Seiz, svissneski auðkýfingurinn sem keypti Hrafnabjörg, sem áður var lúxusvilla Jóhannesar í Bónus, hafi leigt Hollywood leikaranum Tom Cruise hús sitt. Tom hyggst verja nokkrum vikum á Íslandi í sumar við tökur á kvikmyndinni Oblivion.

Þá segir að iðnaðarmenn hafi unnið hörðum höndum í húsinu og gert gagngerar breytingar svo leikarinn uni sér betur í Vaðlaheiðinni. Von er á þotu bráðlega með húsgögnum og búnaði sem Cruise hyggist nota á meðan á dvöl stendur.

Oblivion verður meðal annars tekin upp á Jökulheimaleið, sunnan við Drekavatn að því er segir á vefnum dfs.is.

Þá segist DV hafa heimildir fyrir því að tökur á kvikmyndinni eigi að hefjast í Hrossaborgum í Mývatnssveit á mánudag.

Tom Cruise greindi sjálfur frá því í bandaríska tímaritinu Playboy fyrir skömmu að hann ætlaði að vera hér á landi á fimmtugsafmæli sínu 3. júlí vegna upptöku á kvikmyndinni Oblivion hér á landi.

Fréttavefurinn mbl.is greinir svo frá því í dag að hann og fjölskylda hans verði á Íslandi um helgina en ekki liggi fyrir hvort leikarinn sé þegar kominn til landsins.