Stakk af frá lögreglu og tilkynnti bílinn stolinn skömmu síðar

Lögreglan þarf oft að takast á við furðulega einstaklinga í samfélaginu. Þannig lýsir lögreglan viðskiptum sínum við einn með eftirfarandi hætti:

Eitt af verkefnum lögreglu er að hafa afskipti af ökumönnum sem tala í síma í umferðinni án þess að notast við handfrjálsan búnað. Mál af þessu tagi eru iðulega afgreidd á vettvangi fljótt og vel og síðan halda ökumennirnir áfram för sinni, búnir að leggja frá sér símann og einbeita sér að akstrinum.

Karl á þrítugsaldri var einmitt stöðvaður í umferðinni fyrir þessar sakir á dögunum en viðbrögð hans voru með óvenjulegasta móti. Maðurinn mátti ekkert vera að bíða eftir því að lögreglan afgreiddi málið á vettvangi og því tók hann á rás og hljóp eins og byssubrenndur út buskann. Sjálfsagt hefur hann slegið persónulegt hraðamet í þessu hlaupi án þess þó að um það sé hægt að fullyrða.

Lögreglumönnunum á vettvangi þótti uppátækið heldur undarlegt enda maðurinn ekki grunaður um ölvunar- og/eða fíkniefnaakstur né mældist bíllinn hans á of miklum hraða. Reyndar voru ökuréttindin útrunnin en það kallar sjaldnast á viðbrögð af þessu tagi.

Ekki var lagt í mikla leit að manninum enda talið víst að hann myndi sjá að sér. Sú varð líka raunin og eftir drjúga stund mætti viðkomandi á lögreglustöð til að gera hreint fyrir sínum dyrum, eða svo var haldið. Spurður um athæfið kannaðist maðurinn bara ekkert við það en sagðist hins vegar vera kominn á lögreglustöð til að kæra þjófnað á bílnum.

Sjálfur hefði hann ekki verið undir stýri og þaðan af síður talandi í símann í akstri. Lygasaga mannsins var svona rétt sæmileg æfð en hann gleymdi hins vegar alveg að gera ráð fyrir þeim möguleika að lögreglan ætti hljóð- og myndupptöku af „símtalinu" og upphafi „hlaupsins". Eftir að sú staðreynd varð manninum ljós lét hann af leikaraskapnum og viðurkenndi strax allan þátt sinn í málinu.

Við þetta má bæta að undanfarna daga hefur lögreglan stöðvað marga aðra ökumenn sem voru að tala í síma án þess að notast við handfrjálsan búnað. Enginn þeirra sá ástæðu til að yfirgefa vettvang svona skyndilega.