Lektorinn skýri leka til DV fyrir rektor

Ársæll Valfells, lektor í viðskiptafræði við Háskóla Íslands, þarf að skila Kristínu Ingólfsdóttur, rektor skólans, greinargerð vegna þáttar síns í leka á trúnaðargögnum úr Landsbankanum.

Kristín segist ekki geta svarað því að svo stöddu hvernig mál Ársæls snertir Háskólann og störf hans þar. „Meira get ég ekki sagt fyrr en við höfum farið yfir málið. Það er hjá lögreglu og við vitum ekkert hvar það er statt í því ferli,“ segir rektor og upplýsir að hún hafi í gær rætt málið í síma við Ársæl sem staddur sé erlendis. Hún reikni með að fá greinargerð hans á næstu dögum.

Ársæll upplýsti í fyrradag að honum hefðu borist trúnaðargögn úr Landsbankanum og hann komið þeim á ritstjórn DV að fyrirmælum Gunnars Andersen, þáverandi forstjóra Fjármálaeftirlitsins. Gögnin geymdu bankaupplýsingar um Guðlaug Þór Þórðarson alþingismann. Ársæll er sjálfur fyrrverandi starfsmaður Landsbankans.

Yfirlýsing Ársæls, þar sem hann lýsir þætti sínum í upplýsingalekanum, hefur enn sem komið er ekki haft áhrif á stöðu hans hjá Háskólanumn.

„Á meðan málið er í skoðun og hjá lögreglu þá sjáum við ekki ástæðu til að bregðast frekar við,“ segir háskólarektor. - gar