Rekja óánægju kúnna Dróma til aðgerðarleysis Arion banka

Hluti óánægju viðskiptavina Dróma má rekja til aðgerða og aðgerðarleysis Arion banka en lánasafn Dróma er þjónustað af bankanum. Þetta kemur fram í skýrslu úttektarnefndar um aðgerðir vegna banka- og gjaldeyrishrunsins.

Í nýrri skýrslu úttektarnefndar um aðgerðir í þágu einstaklinga, heimila og fyrirtækja vegna banka- og gjaldeyrishrunsins er farið yfir hvernig þessi úrræði hafi heppnast hjá bönkunum.

Drómi, sem er nafn á slitastjórn SPRON og Frjálsa fjárfestingarbankans fellur þar undir.

Úttektarnefndin gerði ítarlega úttekt á málum Dróma á vormánuðum þessa árs. Í kjölfarið gerði nefndin athugasemdir við afgreiðslu og málshraða mála í 110% leið og að kvartanir og erindi lántaka og annarra fjármálafyrirtækja sem Dróma bárust væru ekki í skilgreindum farvegi. Úr þessu var bætt af hálfu stjórnar Dróma.

Annað sem er athyglisvert í skýrslunni er að hluti kvartana sem hafi beinst að Dróma hafi verið vegna aðgerða og eða aðgerðaleysis þriðja aðila, svo sem Arion banka.

Arion banki þjónustar útlánasafn Dróma. Fyrrum SPRON lántakar koma því inn í afgreiðslu Arion banka vegna sinna mála, t.d til að semja um skuldir sínar.



Ekkert gerðist fyrr en hin opinbera nefnd greip í taumana

Í skýrslu úttektarnefndar kemur fram að Drómi hafi óskað eftir því við Arion haustið 2011 að ákveðin fasteignasala yrði ekki fengin til að verðmeta eignir í málum þar sem Drómi ætti hagsmuna að gæta. Drómi taldi sig hafa ítrekað lent í því að þessi fasteignasala hefði metið eignir verulega undir raunvirði og færði fyrir því rök sem eftirlitsnefndin kannaði. Skilaboðin bárust aldrei til starfsmanna Arion og því héldu þeir áfram samskiptum við hina umdeildu fasteignasölu. Var það ekki fyrr en eftirlitsnefndin gekk í málið sem skriður komst á það.

Nefndin hafði þá orðið þess áskynja að hluti kvartana í fjölmiðlum vegna Dróma voru m.a. tilkomnar vegna þessa. Nefndin fór fram á við Arion í maí 2012 að virða þessa beiðni og þurfti ítrekun einum og hálfum mánuði seinna til að það yrði gert. Þetta leiddi til þess að hluti mála Dróma töfðust með tilheyrandi óþægindum og ama fyrir lántakendur.

Hvorki Drómi né Arion vilja upplýsa hvaða fasteignasala þetta er. Þá hafa heldur ekki fengist upplýsingar um hversu mörg mál er að ræða það kemur ekki fram í skýrslu nefndarinnar.

En hvernig má það vera að hópur viðskiptavina fái kolrangt mat á fasteignir sínar þegar þeir eru að semja um skuldir sínar, gerðar séu athugasemdir við það en þær berist aldrei á réttan stað? Fréttastofan óskaði eftir skýringum á þessu frá Arion banka.

„Við höfum lagt áherslu á að sömu fasteignasölurnar geri fyrir okkur verðmöt í skuldaaðlögunarmálum okkar viðskiptavina, m.a. til að samræmis sé gætt. Drómi gerði hins vegar á síðari stigum athugasemdir við verðmöt frá tiltekinni fasteignasölu þar sem þeim þóttu verðmöt frá henni of lág. Því miður virðist sem athugasemdir Dróma hafi ekki borist til réttra aðila innan bankans og því var ekki brugðist við þeim eins skjótt og ákjósanlegt hefði verið. En um tiltölulega fá mál er að ræða sem töfðust vegna þessa. Ekkert annað fjármálafyrirtæki gerði athugasemdir við Arion banka vegna verðmata umræddrar fasteignasölu," segir Haraldur Guðni Eiðsson, talsmaður Arion banka. thorbjorn@stod2.is