Stjórnarmaður Eirar segir gögn hafa verið afhent saksóknara í leyfisleysi

Fulltrúaráðsfundur hjúkrunarheimilisins Eirar stendur nú yfir, þar verður meðal annars rætt um að víkja stjórn Eirar í heilu lagi frá.

Stjórnarfundur fór fram í morgun en þar mun Magnús L. Sveinsson, stjórnarformaður, meðal annars hafa lagt fram bókun þar sem því var mótmælt að gögn Eirar hafi verið tekin og afhent sérstökum saksóknara á dögunum. Meðal annars var því haldið var að gögn hefðu verið tekin í leyfisleysi.

Mikill styr hefur staðið um heimilið síðan fréttastofa Stöðvar 2 upplýsti um gríðarlega bága fjárhagsstöðu hjúkrunarheimilisins fyrir nokkrum vikum síðan. Þá var Vilhjálmur Þ. Vilhjálmsson formaður stjórnarinnar en hann sagði af sér vegna málsins.

Bókun Magnúsar L. Sveinssonar má lesa hér að neðan.

„Eins og komið hefur fram var einróma samþykkt í stjórn Eirar í nóvember sl. Að óska eftir rannsókn á ástæðum þess fjárhagsvanda sem Eir stendur frammi fyrir. Þessari rannsókn er ekki lokið.

Þrátt fyrir að þessari rannsókn sé ekki lokið, hafa þrír stjórnarmenn Eirar, þau Stefán Benediktsson, Þórunn Sveinbjörnsdóttir og Björn Arnar Magnússon, séð ástæðu til að ganga á fund fulltrúa sérstaks saksóknara þann 11. des. Og óska eftir því að athugað verði hvort tilefni sé til rannsóknar á starfsháttum Eirar undanfarin ár. Að sögn Stefáns í Fréttablaðinu 12. des., afhentu þremenningarnir fulltrúunum gögn um rekstur heimilisins síðasta árið, fundar og bókhaldsgögn, minnisblöð og tölvupóst.

Það vekur athygli að þremenningarnir biðja um þessa rannsókn án vitundar Eirar. Þá vekur það sérstaka athygli að þau höfðu með sér bókhaldsgögn, minnisblöð og fleira úr rekstri Eirar og afhentu fulltrúum sérstaks saksóknara, án vitundar og heimildar stjórnar Eirar eða framkvæmdastjóra.

Ég tel að hér sé um mjög alvarlegt trúnaðarbrot gagnvart stjórninni að ræða og nauðsynlegt sé að láta rannsaka hvaða trúnaðargögn af skrifstofu Eirar þau hafa afhent fulltrúum sérstaks saksóknara.

Það er umhugsunarefni að þetta sama fólk, sem þannig gengur fram hjá stjórn Eirar og leynir henni vitneskju um dreifingu trúnaðargagna frá Eir, hefur kvartað undan því að gjörningar hafi verið framdir í rekstri Eirar sem ekki voru kynntir stjórninni og því án vitundar hennar.

Þá vil ég lýsa vanþókun minni á frétt í Ríkisútvarpinu 5. des. sl., þar sem sagt var að þrír stjórnarmenn Eirar, sem áður eru nefndir, hafi ákveðið að biðja sýslumanninn í Reykjavík um að skoða starfshætti srkfistofu Eirar vegna væntanlegs stjórnarkjörs í Eir. Í fréttinni er framkvæmdastjóra Eirar, fjármálastjóra og ritara sérstaklega getið. Ég tel að með þessu sé vikið mjög ómaklega að þessu góða starfsfólki Eirar, sem aldrei hefur sýnt annað en heiðarleika og vandvirkni í öllum störfum sínum fyrir Eir og ég vil af þessu tilefni þakka af alhug."