Maggi Gylfa: Þetta setur allt á annan endann

„Þetta er alveg skelfing og setur allt á annan endann," segir Magnús Gylfason, framkvæmdastjóri fiskvinnslunnar Svalþúfu og knattspyrnuþjálfari Vals í knattspyrnu.

Milljónatjón varð í fiskvinnslunni þegar eldur kom þar upp í nótt. Húsið var mannlaust og börðust hátt í sextíu slökkviliðsmenn við eldinn fram á morgun.

„Það er bara verið að rannsaka eldsupptök, það eru einhverjar líkur á að eldurinn hafi komið upp í stakkageymslu sem er hér, en það eru bara getgátur. Það veit enginn neitt," segir Magnús í samtali við fréttastofu.

Fyrirtækið vinnur með fisk, bæði að þurrka hann og salta hann. „Við erum með rúmlega þrjátíu manns í vinnu og það er náttúrulega allt strand núna. Við erum búin að vera á fullu hérna síðan tvö í nótt. Ég er búinn að leigja hús sem er hérna við hliðina á, og vonandi getum við komið framleiðslunni í gang sem allra fyrst," segir hann.

Magnús segir að tjónið hlaupi á milljónum króna. „Það er mikil vinna framundan," segir hann.

Slökkvistarf gekk vel í nótt þar sem það vildi svo vel til að vindur var hægur.