Búist við góðri kjörsókn í prófkjörum

Prófkjör stendur nú yfir hjá Samfylkingu og Sjálfstæðisflokki í Suðvesturkjördæmi og búast báðir flokkar við góðri kjörsókn.

Hjá Samfylkingunni hófst rafrænt flokksval á miðnætti í gær og stendur til klukkan fimm en þeir sem ekki hafa aðgang að netbanka geta kosið á hefðbundinn hátt í fimm bæjarfélögum kjördæmisins. Tíu eru í framboði, þar af tveir í fyrsta sæti. Ýr Gunnlaugsdóttir er formaður kjördæmisráð Samfylkingarinnar í Suðvesturkjördæmi.

„Flokksvalið það gengur bara ljómandi vel, það eru núna um 5700 manns á kjörskrá, síðast 2009 var rétt um 50% kjörsón og ég vona við náum því," segir Ýr.

Rétt fyrir hádegi höfðu tæplega 1200 kosið í kjördæminu og segir Ýr að það hafi áhrif að rafræna kosningin hafi verið opin í sólarhring fyrir opnun kjörstaða.

„Þetta breytir því í rauninni að þú getur kosið hvar sem þú ert staddur ef þú ert bara í tölvusambandi.," útskýrir Ýr.

Búist er við að niðurstaða flokksvalsins liggi fyrir um kvöldmatarleitið.

Þá fer einnig fram rafrænt flokksval Samfylkingarinnar í Norðausturkjördæmi í dag og stendur til klukkan sex, þar eru átta í framboði, tveir í fyrsta sæti og einn í fyrsta til sjötta sæti, en um hádegi höfðu tæplega fjögur hundruð kosið rafrænt þar.

Hjá Sjálfstæðisflokknum hófst hefðbundið prófkjör klukkan níu í morgun og stendur til klukkan sex en hægt er að kjósa á sex stöðum í kjördæminu. Sextán eru í framboði þar af tveir í fyrsta sæti. Jónas Þór Guðmundsson er formaður kjördæmisráðs Sjálfstæðisflokksins í Suðvesturkjördæmi.

„kjörsókn hefur verið ágæt og er að glæðast eftir því sem veðrið er að lægja," segir Jónas.

Hann segist búast við svipaðri kjörsókn og fyrir alþingiskosningarnar 2009 en þá kusu um fimmþúsund og sexhundruð manns.

„Talning byrjar um miðjan dag hjá okkur og við munum vera með fyrstu tölur klukkan sjö í kvöld og síðan verða tölur birtar á netinu á hálftímafresti og við vonumst til að vera með lokatölur milli tíu og ellefu í kvöld," segir Jónas.

Rétt fyrir hádegi höfðu tæplega 1200 kosið í flokksvalinu í Suðvesturkjördæmi og tæplega 400 í Norðausturkjördæmi. Kosningu lýkur í dag laugardag kl. 17.00 í Suðvesturkjördæmi og kl. 18.00 í Norðausturkjördæmi.