Mikill áhugi á smáforriti Neyðarlínunnar

Um átta hundruð manns stukku til og náðu í smáforrit 112, eftir sýningu Neyðarlínunnar á Stöð 2.

Í þættinum var farið yfir sögu manns sem týndist upp á Esju fyrir rúmu einu og hálfu ári. Mikil leit var gerð að manninum og nutu björgunarmenn aðstoðar þyrlu Landhelgisgæslunnar sem síðar fann manninn. Þá var líkamshiti hans kominn niður fyrir 30 gráður.

Undir lok var athygli vakin á smáforriti Neyðarlínunnar. Appið hefði breytt miklu og sannarlega komið að góðum notum í þessu tilviki.

112 appið, sem hannað er af Stokki, staðsetur menn og kemur þeim í samband við Neyðarlínuna. Hreinn Gústafsson, framkvæmdastjóri Stokks, var gestur í útvarpsþættinum Reykjavík síðdegis á Bylgjunni í dag.

„Þetta var stærsti dagurinn frá því að smáforritið fór í loftið, " segir Hreinn. „Það voru tæplega átta hundruð manns sem náðu í forritið í gær."

Þá segir Hreinn að það séu jafnt Íslendingar og erlendir ferðamenn sem hafi áhuga á forritinu. Þá hafa viðtökurnar verið afar góðar.

„Við unnum forritið í samstarfi við Valitor og við gáfum Neyðarlínunni þetta app," segir Hreinn.

Hægt er að nálgast viðtalið í heild sinni hér fyrir ofan.