Sakaður um kynferðislegt athæfi með ólögráða pilti

Leikbrúðustjórnandinn Kevin Clash, sem þekktastur er fyrir túlkun sína á hinum ástsæla Elmo, hefur verið leystur tímabundið frá störfum. Hann er sakaður um að hafa átt í kynferðislegu ástarsambandi við pilt undir lögaldri.

Brotin er sögð hafa átt sér stað fyrir sjö árum þegar pilturinn var 16 ára gamall. Clash, sem er 52 ára gamall, hefur viðurkennt að hafa átt í ástarsambandi við drenginn en þvertekur þó fyrir að hafa gerst sekur um kynferðisbrot og heldur því fram að pilturinn hafi verið lögráða.

Sesame Workshop, samtökin sem framleiða hina vinsælu brúðuþætti um Sesame-stræti, segja að Clash hafi sannarlega gerst sekur um dómgreindarskort en staðhæfa þó að útilokað sé að pilturinn hafi verið undir lögaldri þegar hann og Clash áttu í sambandi.

„Ég átti sannarlega í ástarsambandi við kæranda," sagði Clash í yfirlýsingu til fjölmiðla. „En sambandið var með samþykki beggja aðila og ég harma að það sé verið að mála sambandið sem eitthvað allt annað en það var í raun."

„Kevin heldur því fram að ásakanirnar séu bæði rangar og ærumeiðandi og hann mun berjast fyrir mannorði sínu," sagði talsmaður Sesame Workshop, vinnuveitandi Clash.

Það er The New York Post sem greinir frá þessu.