Nokkuð um hálkuslys og varað við færðinni

Engin meiddist, þegar jepplingur með fimm manns um borð valt út af Reykjanesbrautinni í gærkvöldi. Þar hafði óvænt myndast hálka.

Hann slapp líka ómeiddur vöruflutningabílstjórinn, sem missti bíl sinn þversum á Fjarðarheiði í hálku í gærkvöldi. Vegurinn var lokaður í talsverðan tíma á meðan verið var að koma bílnum aftur á rétta stefnu.

Búast má við að hálka sé á flestum leiðum, því í gærkvöldi fór að létta til og kólna, en vegir voru blautir eftir rigningu dagsins. Á síðu Vegagerðarinnar segir veðurfræðingur að þessu til viðbótar hafi gengið á með smáskúrum sunnan- og suðvestanlands, sem geri ástandið sérlega varhugavert.