Faldi fíkniefni í ljósakrónu

Tveir fíkniefnasalar voru á dögunum handteknir og lagði lögreglan á Suðurnesjum hald á umtalsvert magn kannabisefna í tengslum við það. Í húsleit, sem gerð var í íbúðarhúsnæði í Reykjanesbæ fannst poki með kannabisefnum í loftljósi í stofunni. Talsvert var af umbúðum utan af kannabisefnum á stofuborðinu. Fíkniefnaleitarhundur lögreglunnar fann svo til viðbótar tuttugu poka með kannabisefnum í stigagangi hússins.

Félagi mannsins hafði daginn áður verið handtekinn með kannabisefni í níu sölupakkningum á sér. Við húsleit í það skiptið fannst kannabis út um alla íbúð, ásamt kannabisfræjum. Það var í annað skipti á skömmum tíma sem sá var tekinn vegna fíkniefnasölu, því áður hafði lögregla gert húsleit hjá honum og þá fundust um 100 grömm af kannabisefnum, ýmist í söluumbúðum eða stærri pokum, auk lítillar vogar.