Séra Sigurður segist ekki hafa brotið af sér

„Ég hafna því alfarið að störf mín þar hafi orkað tvímælis. Því fagna ég því ef gerð verður úttekt á rekstri hjúkrunarheimilisins. Hún mun væntanlega leiða í ljós hvort eitthvað hafi verið athugavert við störf mín sem framkvæmdastjóri eða við störf stjórnar heimilisins á þessum tíma," segir séra Sigurður Helgi Guðmundsson, fyrrverandi stjórnarformaður Hjúkrunarheimilisins Eirar. Hann sendi frá sér yfirlýsingu í dag.

Sigurður lét af störfum sem framkvæmdastjóri vorið 2011. Í fjölmiðlum í dag hefur verið greint frá því að ýmislegt bendi til að fjárhagserfiðleika og óráðsíu innan Eirar megi rekja til framkvæmdastjóratíðar séra Sigurðar Helga Guðmundssonar. Þá er Sigurður sagður hafa greitt utanlandsferð dóttur sinnar og fjölskyldu á reikning Eirar. Sigurður segir sjálfur að greiðslan hafi verið vegna lögfræðivinnu sem tengdasonur hans, Jóhannes Rúnar Jóhannesson, hafi unnið fyrir Eir.