Frumvarp að nýrri stjórnarskrá lagt fram á þingi

Stjórnskipunar- og eftirlitsnefnd Alþingis samþykkti í morgun að leggja fram frumvarp til breytinga á stjórnskipunarlögum, sem byggir á vinnu sérfræðingarhóps sem fór yfir tillögur stjórnlagaráðs. Tillögurnar voru samþykktar í þjóðaratkvæðagreiðslu þann 20. október síðastliðinn. Fyrsta umræða um stjórnskipunarfrumvarpið mun fara fram á þriðjudaginn.

Tillaga um að leggja frumvarpið fram var samþykkt af meirihluta stjórnskipunar- og eftirlitsnefndar með stuðningi fulltrúa Hreyfingarinnar. Ólöf Nordal, fulltrúi Sjálfstæðisflokksins í nefndinni, greiddi atkvæði gegn framlagningu frumvarpsins.

„Það skortir ennþá athugun á heildaráhrifum frumvarpsins og það tel ég að hefði þurft að gera áður en frumvarpið var lagt fram. Við teljum málið einfaldlega ekki tilbúið til framlagningar," segir Ólöf Nordal.

Valgerður Bjarnadóttir segir að tillögur frumvarpsins séu óbreyttar frá því sem var þegar sérfræðinganefndin skilaði þeim af sér. Þingmenn hafi ekki gert neinar breytingar þar á. „Síðan kemur málið náttúrlega aftur inn í nefndina og fer þar til umræðu, en málið er núna komið í þinglega meðferð og þá hafa þingmenn allan rétt til að fjalla um málið," segir Valgerður.