Fíkniefnastríðið er tapað

Staða lögreglunnar var rædd á Alþingi í dag og viðbrögð við skipulagðri glæpastarfsemi. Margrét Tryggvadóttir, þingkona Hreyfingarinnar, steig í pontu og lýsti því yfir að baráttan við fíkniefnadjöfulinn væri töpuð.

Margrét var gestur í útvarpsþættinum Reykjavík síðdegis á Bylgjunni í dag.

„Ég hef verið að skoða þessi mál og ég er afar ósátt með það hvernig við komum fram við þennan vanda, við fíkla og aðra sem tengjast þessum heimi," Margrét. „Þeir sem hafa lent í vandamálum með fíkniefni er ýtt út á jaðar samfélagsins. Þeir eru smánaðir og mér finnst að við tröðkum á mannréttindum þeirra."

Þá vill Margrét taka mið af þeim löndum sem hafa farið þá leið að lögleiða vægari fíkniefni. Þeir sem ánetjast hafa harðari fíkniefnum, til dæmis heróíni, yrði þá gefið færi á að nálgast efnin með einföldum leiðum og með hjálp yfirvalda.

„Ég er ekki að finna upp hjólið," segir Margrét. „Þetta hefur verið reynt í nokkrum Evrópulöndum og í Kanada og það með góðum árangri."

„Við verðum að fara horfa á þetta vandamál sem heilbrigðisvandamál og ráðast á það þannig, rétt eins og við höfum gert með áfengissýki."

Hægt er að hlusta á viðtalið í heild sinni hér fyrir ofan.