WOW air stundvísara en Icelandair

WOW air er stundvísara en Icelandair samkvæmt nýjustu stundvísistölum sem birtar eru á heimasíðu Túrista. Raunar er mjótt á munum hvað varðar stundvísi félaganna.

Í heildina voru ferðir WOW air til og frá landinu á réttum tíma í 90 prósent tilvika, en hjá Icelandair var hlutfallið 87 prósent. Tafir í mínútum voru sárafáar.

Farþegar á Keflavíkurflugvelli komust úr landi á réttum tíma í rúmlega níu af hverjum tíu tilfellum síðustu tvær vikur. Fáir þurftu því að verja löngum tíma í brottfarasal flugstöðvarinnar. Farþegavélarnar lentu líka langoftast í Keflavík samkvæmt áætlun sem er vísbending um að félögin hafi líka haldið áætlun á erlendu flugvöllunum.

Þessa dagana eru farnar um tuttugu ferðir á dag frá Keflavíkurflugvelli. Í júlí voru þær um tvöfalt fleiri. Vægi Icelandair hefur aukist frá því í sumar því þá stóð félagið fyrir 68,5% af brottförum frá Keflavík samkvæmt útreikningum Túrista. Nú er hlutfallið um áttatíu prósent. Tíunda hver ferð er á vegum WOW air en easyJet, Norwegian, Primera Air og SAS fyrir restinni.

Hægt er að nálgast nánari upplýsingar um stundvísi flugfélaganna á heimasíðu Túristans.