Gunnleifur skrifaði undir þriggja ára samning við Blika

Gunnleifur Gunnleifsson, fyrrum fyrirliði og markvörður Íslandsmeistara FH, skrifaði í dag undir þriggja ára samning við Breiðablik. Hann var kynntur á blaðamannafundi í Smáranum í dag.

„Við hittum Gunnleif fyrst í gær og við náðum saman í morgun. Við teljum að þetta sé gott skref fyrir okkur og fyrir hann. Gunnleifur er á besta aldrei sem markvörður og við horfum mörg ár fram í tímann ekki bara til eins árs," sagði Einar Kristján Jónsson, formaður Knattspyrnudeildar Breiðabliks..

„Breiðablik stefnir á Íslandsmeistaratitilinn á næsta ári og því viljum við styrkja okkur með bestu leikmönnunum sem eru í boði," bætti Einar við.

Breiðablik endaði í 2. sæti í Pepsi-deildinni í sumar en liðið varð Íslandsmeistari 2010 og bikarmeistari 2009. Gunnleifur varð bikarmeistari með FH 2010 og Íslandsmeistari með liðinu í sumar þar sem hann hélt oftast hreinu af öllum markvörðum deildarinnar.