25 ára kona lést frá eiginmanni og 3ja ára gamalli dóttur

Anna Chmielewska var nýbúin að borða með þriggja ára gamalli dóttur sinni þegar hún brá sér í bað á föstudagskvöld fyrir viku. Anna, sem var flogaveik, fékk flogakast í baðinu og drukknaði. Dóttir hennar hringdi í föður sinn, Andrzej Chmielewski, eiginmann Önnu um leið og hún sá að móðir hennar hefði fengið kast og kallaði á hann að koma heim. Svona lýsir Alan Jones, vinur þeirra hjóna atburðarrásinni, í samtali við Vísi. Hann segir að Andrzej, vini sínum, líði mjög illa núna.

„Hann er mjög kvíðinn af þvi að þau eiga engan pening. Það kostar 800 þúsund krónur að senda jarðneskar leifar hennar heim til hennar með flugi," segir Alan. „Hann fær enga hjálp frá stéttarfélaginu eða flugfélögum og því ákvað ég að kalla í fólk og óska að hægt verði að setja upp styrktartónleika fyrir þau," segir hann. Styrktartónleikarnir verða á Spot í Kópavogi þann 10. október klukkan 20. Alan hefur beðið Margréti Eir, Haffa Haff, Bjartmar og fleiri um að koma fram á tónleikunum.

Þá hefur líka verið opnaður styrktarreikningur fyrir feðginin. Hér að neðan eru upplýsingar um hann.

Reikningsnúmer: 0111-26-100713

Kennitala: 040285-5399

Fram kemur í Fréttatímanum í dag að þau Andrzej og Anna hafi flutt hingað í febrúar síðastliðnum. Hann hafi unnið á veitingastaðnum Nítjándu í Kópavogi og hún líka verið nýfarin að vinna þar. Andrzej hefur hug á að búa áfram á Íslandi þrátt fyrir áfallið en vill að lík Önnu verði flutt til Póllands.