Þægilegt andrúmsloft á RIFF

Kvikmyndahátíðin RIFF nær hápunkti í kvöld þegar veitt verða verðlaun í fjölda flokka. Aðalverðlaun hátíðarinnar eru Gullni lundinn og við hittum formann dómnefndarinnar sem segist afar hrifinn af hátíðinni.

Geoffrey Gilmore er í dag stjórnandi Tribeca hátíðarinnar í New York en í sautján ár stýrði hann Sundance hátíð Roberts Redford. Hann segist afar hrifinn af RIFF og ekki síst sjálfu landinu.

„Ég nýt þess sannarlega. Þetta er í fyrsta skipti sem ég kem til Íslands og mig hefur langað að koma hingað í mörg ár," segir Geoffrey.

Jeffrey segir að úrval myndanna á RIFF hafi komið sér ánægjulega á óvart, erfitt sé að gera upp á milli.

Gullni lundinn, eru veitt ungum kvikmyndagerðarmönnum sem aðeins hafa gert eina eða tvær myndir á ferlinum. En á hvað horfir dómarinn þegar hann metur myndirnar sem tilnefndar eru?

„Við leitum að einhvers konar frumleika, að þær taki áhættu. Það var einmitt um þetta sem keppnin snerist."

Jeff segir andrúmsloftið á RIFF mun þægilegra en á stóru hátíðunum út í heimi þar sem allt snúist um viðskipti.

„Maður getur hitt alla, maður fær tækifæri til að setjast niður og tala við fólk, maður er ekki bara að þjóta frá einum viðburði til annars, eins og það er til dæmis í Cannes."

Starfs síns vegna horfir Jeff á gríðarlegan fjölda mynda, eða rúmlega sex hundruð á ári. Það kemur því ekki á óvart að hann skuli hafa séð Djúpið hans Baltasars á kvikmyndahátíðinni í Toronto á dögunum. Hann segist hafa orðið mjög hrifinn.

„Hún var alls ekki eins og ég bjóst við að hún væri. Maður hugsar um þetta sem sögu um skipsskaða og maður hefur séð slíkar myndir áður. En þetta er óvenjuleg saga um björgun sem er næstum ótrúleg," segir Geoffrey að lokum.