Segir Jóhönnu færa Samfylkinguna til hliðar í stjórnmálum

Formaður þingflokks Sjálfstæðisflokksins segir að forsætisráðherra sé að færa Samfylkinguna til hliðar í íslenskum stjórnmálum með yfirlýsingum sínum. Forsætisráðherra útilokaði samstarf við Sjálfstæðisflokkinn í viðtali um helgina.

Jóhanna Sigurðardóttir, forsætisráðherra, er í viðtali í helgarblaði Fréttablaðsins.

Orðrétt segir Jóhanna í viðtalinu: „Samfylkingin mun aldrei sætta sig við að starfa með þeim sem krefjast þess að viðræðum (við ESB innsk.blm) verði hætt með einhverjum hætti áður en fyrir liggur samningur sem þjóðin fær að greiða atkvæði um.“

Þessu er beint að sjálfstæðismönnum sem vilja gera hlé á aðildarviðræðum við Evrópusambandið og halda þjóðaratkvæðagreiðslu um hvort halda eigi þeim áfram. Þá lýsti Bjarni Benediktsson, formaður flokksins, því yfir í þættinum Klinkinu að fyrir slíka þjóðaratkvæðagreiðslu myndi hann berjast fyrir því að viðræðunum yrði slitið.

Forsætisráðherra segir jafnframt í viðtalinu í Fréttablaðinu að sér finnist það „óbærileg tilhugsun að Sjálfstæðisflokkurinn komist aftur til valda eftir kosningar.“

Illugi Gunnarsson, formaður þingflokks Sjálfstæðisflokksins, segist hafa tekið eftir þessum yfirlýsingum Jóhönnu.

„Þetta er auðvitað merki um að það er verið að setja Samfylkinguna til hliðar í íslenskum stjórnmálum. Það er auðvitað bara ákvörðun sem forystumenn þess flokks taka. Hitt er það að eftir kosningar er það skylda þeirra sem eru kosnir á Alþingi að reyna að mynda starfhæfa ríkisstjórn til að takast á við þau fjölmörgu verkefni sem bíða. Og ef Samfylkingin vill ekki koma að neinum slíkum verkum þá er það auðvitað bara ákvörðun þeirra," segir Illugi.

En eru ekki talsverðar líkur á því að Sjálfstæðisflokkurinn verði utan ríkisstjórnarstjórnar þrátt fyrir að mælast með meira en 30 prósent fylgi, í ljósi orðræðunnar í stjórnmálunum? Forystumenn stjórnarflokkanna hafa á opinberum vettvangi biðlað til framsóknarmanna. Þá hefur formaður Framsóknarflokksins sagt hrunið vera „fall frjálshyggjunnar“ í viðtali.

„Hvort að Sjálfstæðisflokkurinn fer í ríkisstjórn eða ekki hvílir náttúrlega á kosningum. Og ég er þeirrar skoðunar að menn eigi að sýna kjósendum þá virðingu að bíða kosninga og sjá hver niðurstaðan verður og síðan mynda ríkisstjórn á grundvelli niðurstöðu kosninganna. En ekki á einstrengingslegum yfirlýsingum eins og þeim sem Jóhanna hefur verið að gera, bæði gagnvart Sjálfstæðisflokknum og gagnvart Samtökum atvinnulífsins," segir Illugi.