Þær skýringar hafa verið gefnar að lánaskjöl vegna 171 milljónar evra millifærslu frá Kaupþingi til félagsins Lindsor Holdings í miðju bankahruni hafi verið undirrituð marga mánuði eftir á að kröfu skiptastjóra Kaupþings í Lúxemborg.



Rannsókn sérstaks saksóknara á Lindsor-málinu svokallaða er vel á veg komin.



Kaupþing fékk 500 milljónir evra af neyðarfé íslenska ríkisins að láni frá Seðlabankanum 6. október 2008 í miðju hruni og lánaði skúffufélaginu Lindsor Holdings Corporation 171 milljón evra sama dag. Bankinn féll tveimur dögum síðar.



Málið er rannsakað sem umboðssvik, en stjórnendur Kaupþings eru grunaðir um að hafa stefnt fjármunum Kaupþings „í verulega hættu" eins og það var orðað í gæsluvarðhaldskröfu yfir Magnúsi Guðmundssyni, sem stýrði Kaupþingi í Lúx.



Peningarnir voru notaðir til að kaupa skuldabréf af Kaupþingi í Lúx, einstökum starfsmönnum þess banka og félagi í eigu Skúla Þorvaldssonar.



Umboðssvikin eru talin hafa falist í því að velta hættu af fjárhagstjóni af starfsmönnum Kaupþings banka yfir á bankann sjálfan, en umboðssvik geta varðað allt að sex ára fangelsi ef sakir eru miklar. Skemmst er að minnast þess að fyrrverandi stjórnendur Byrs voru dæmdir í fjögurra og hálfs árs fangelsi fyrir umboðssvik í Exeter-málinu svokallaða.



Eins og fréttastofa hefur greint frá hafa stjórnendur Kaupþings gefið þær skýringar að bankinn hafi keypt mikið af eigin skuldabréfum til að reyna að verja bankann falli á árinu 2008. Evrurnar frá Seðlabankanum hafi hins vegar ekki farið í þetta, heldur að gera upp við sparifjáreigendur á EDGE-reikningunum svokölluðu eftir áhlaup á bankann í tíu löndum 7. október 2008, daginn eftir setningu neyðarlaganna.



Það sem vakti sérstakar grunsemdir við lánið til Lindsor Holdings var að öll skjöl voru undirrituð í nóvember og desember 2008, mörgum mánuðum eftir hrun og mun Guðný Arna Sveinsdóttir, sem sat þá í skilanefnd Kaupþings, hafa gengið frá skjölunum, en hún var áður fjármálastjóri Kaupþings. Af þessum sökum er Guðný Arna grunuð um hlutdeild í meintum brotum stjórnenda bankans.



Fréttastofan reyndi ítrekað að ná tali af Guðnýju við vinnslu fréttarinnar, án árangurs, en hún er búsett erlendis.



Sérstakur saksóknari telur í raun að skjölin hafi verið fölsuð og dagsett aftur í tímann.



Samkvæmt heimildum fréttastofu hafa þær skýringar verið gefnar að skjölin hafi öll verið undirrituð eftir á að kröfu skiptastjóra Kaupþings í Lúxemborg en á þessum tíma var bankinn í fjárhagslegri endurskipulagningu. Bankinn var stuttu síðar seldur David Rowland og fjölskyldu og hlaut síðan nýtt nafn, Banque Havilland.



Þessar skýringar um að skiptastjórinn hafi gert kröfu um frágang skjala hafa ekki breytt stöðu málsins, sem er enn í rannsókn. thorbjorn@stod2.is