Segja meirihluta borgarstjórnar skattleggja að óþörfu

Í tillögu um endurskoðun útsvarstekna sem lögð var fram á borgarráðsfundi í dag kemur í ljós að enn og aftur innheimta borgaryfirvöld meiri skatta en gert er ráð fyrir í áætlun. Þetta kemur meðal annars fram i tilkynningu frá borgarstjórnarfulltrúum Sjálfstæðisflokksins.

Þar segir að fulltrúar Sjálfstæðisflokksins hafi ítrekað bent á það að útsvar í Reykjavík þurfi ekki að vera í hámarki og að svigrúm sé til skattalækkana.

Annað árið í röð kemur í ljós að skatttekjur í fjárhagsáætlun eru langt umfram það sem þörf er á í rekstri borgarinnar eða um 2 milljarðar, að því er greint er frá í tilkynningu sjálfstæðismanna.

„Það er algerlega óverjandi að á sama tíma og almenningur hefur mátt þola verulega kaupmáttarrýrnun og endalausar hækkanir af hálfu hins opinbera, skuli borgarstjórn innheimta meiri skatta af borgarbúum en þörf er á. Hófleg skattheimta og aðhald í rekstri nægir til að tryggja öfluga grunnþjónustu í borginni. Þannig var haldið á málum í Reykjavík. Þær forsendur eru enn til staðar og meirihlutinn í Reykjavík á að nýta svigrúmið sem til staðar er í þágu borgarbúa og draga til baka skattahækkanir síðustu tveggja ára." Sagði Hanna Birna Kristjánsdóttir, oddviti Sjálfstæðisflokksins á fundinum í dag.

Tillagan sem lögð var fram á fundinum verður tekin til endanlegrar afgreiðslu á borgarstjórnarfundi þann 4. september en borgarráðsfulltrúar Sjálfstæðisflokksins lögðu fram eftirfarandi bókun á fundinum í dag:

„Enn og aftur er upplýst að áform í fjárhagsáætlun standast ekki . Nú kemur, með svipuðum hætti og í síðustu fjárhagsáætlun, í ljós umtalsvert vanmat skatttekna sem staðfestir að álögur á Reykvíkinga eru umfram þörf. Borgarráðsfulltrúar Sjálfstæðisflokksins hafa ítrekað bent á þessa staðreynd, gagnrýnt hækkanir meirihlutans og flutt tillögur um að stilla skattheimtu í hóf. Þessi breyting á fjárhagsáætlun gefur tilefni til að endurtaka það."