Krían er einkennisfugl Dögunar

Stjórnmálaaflið Dögun samþykkti formlega nýtt merki fyrir flokkinn í gær. Merkið er fljúgandi kría með rísandi sól í bakgrunn.

Dögun velur kríuna sem einkennisfugl sinn þar sem hún er gjarna nefnd heimskautaþerna á erlendum málum. Þerna skýrskotar til þjónustu en Dögun ætlar sér að þjóna almenningi. „Krían er einnig jafnréttissinni og búningur hennar óháður kyni," segir í tilkynningu flokksins.

Krían er athafnasöm sem dögunarmenn telja einkenna sig. Þá getur hún verið herská og hávær en aðeins þegar varpi hennar er ógnað af mönnum eða dýrum. Þetta eru kostir sem Dögun telur að eigi að prýða stjórnmálamenn.

Bakgrunnur merkisins felst í litum dagrenningar en Dögun vill boða nýja tíma, nýja hugsun og ný vinnubrögð í stjórnmálum á Íslandi.