Kornrækt verði margfölduð á Íslandi

Fjórfalda mætti kornrækt á Íslandi, að mati tilraunastjóra Landbúnaðarháskóla Íslands. Hann segir að ræktun korns hafi sjaldan verið jafn arðbær sem nú og telur að þarna liggi einhver bestu sóknarfæri íslenskra bænda.

Kynbætur á byggi sem miða að því að fá sem sterkust afbrigði fyrir Ísland hafa verið lykillinn að stóraukinni kornrækt íslenskra bænda. Jónatan Hermannsson, tilraunastjóri kornræktar, segir að engin kornrækt væri á Íslandi ef menn þyrftu að búa við þau afbrigði sem til voru fyrir 40 árum. Framfarir hefðu verið nokkuð jafnar allan þennan tíma, eða um 1% uppskeruauki á ári ásamt auknu öryggi.

Jónatan telur að í kornrækt felist einhver mestu sóknarfæri landbúnaðarins.

"Við getum fyrirhafnalaust tvöfaldað kornræktina og nýtt það til fóðurs. Við ættum að geta líka, með smátilfæringum, allt að því fjórfaldað hana," segir Jónatan í viðtali í fréttum Stöðvar 2.

Þá er hann fyrst og fremst að tala um byggrækt til að spara innkaup á erlendu skepnufóðri og sem lið í endurnýjun túna, en mælir líka með aukinni kornrækt til manneldis. Hluti íslenska byggsins sé þegar notað sem morgunkorn, brauðkorn og einnig til ölbruggunar.

"Allt það er góðra gjalda vert og það er mjög gaman að þetta skuli vera hægt."

Og Jónatan telur að ræktun korns á Íslandi hafi sjaldan verið arðsamari en nú en segir að menn verði að stilla fjárfestingu í hóf.

"Eins og núna, þegar útlent korn er það dýrasta sem það hefur nokkurn tíma verið, og veðurfar hér og skilyrði til kornræktar það besta sem þau hafa verið, þá hlýtur íslensk kornrækt núna að standa vel að vígi."